شعر إيمان يوسف المنشور فى كتاب
قصيدة : ملامح الفجر
(ضفائر النار والندى / أصوات شعرية سكندرية)ـ
قصيدة : سافر
قصيدة : طوفان
................ملامح فجر
................
كتبتك فوق سطور عمرى ... ملامح فجر
ومديت لى شعاع دافى
بيطوى لى صعاب الهجر
ما بين الشمس وغروبها
غزلتك جوه تكوينى
بتهدينى وتحمينى وترضينى
تخلينى كما النجمات
شفايفك لما تندهنى ... وحشتينى
تفر الدمعة من عينى ... وتسقينى
بأنهارك بتسقينى
وتخلق لى ساعات الحلم بستانى
وتوعدنى بلهفة قلبك المفتوح
ما تجعل عمرى يوم مجروح
وصدقتك وإحساسى بيندهلك
كتبتك فوق سطور عمرى ملامح فجر
بتتقابل مع الصدفة
وتبدر فى السلام لهفة
يغرد فينا طير الحب
يدوينا ف همس القلب
تطوقنا أحاسيسنا
حاجات ياما تغربنا
وتجمعنا مشاعرنا
.................
سافر
.................
ياريتك تسافر
وتشتاق لقلبى
وتكتب لى دايماً على ذكرى حبى
ويبقى جوابك
مدوب عواطفى
وأقراه تمللى
فى ليلى وصبحى
وأعرف بأنى
مهمة فى وجودك
وترجع بشوقك
ويرجع حنانك
وأحس إنى فعلاً
مهمة فى حياتك
...............
طوفان
................
افرش أوراق صفصافك
واكتبنى فوق أوصافك
نفض إيديك من همك
وتعالى ....
ودوب كل جليدك
القف قلبى
من بين المسافات العطشانة
واتندم
على كل دقيقة عدت من غيرى
أطلق طيرى
توقيت أعاصيرى
طيش ـ جنونى ـ مدى ـ جزرى
اطلقنى أرحل فيك
المس نورك وادخل زمنك
وأنت تكون وحدك محبوب
